တရုတ် နွေဦးနှစ်သစ်ကူးပွဲတော်ဆိုတာနဲ့ ‌အနီတောက်တောက် ပွဲအပြင်အဆင်တွေ၊ မီးပုံးလှလှတွေ၊ ခြင်္သေ့အကအလှတွေနဲ့ အရောင်၊ အရသာမျိုးစုံတဲ့ စားသောက်ဖွယ်ရာတွေ စားပွဲအပြည့် ခင်းကျင်းထားကြတာ တွေ့ဖူးကြမှာပါ။ တရုတ်ပြက္ခဒိန်ပေါ်မှာ အခြေခံထားတဲ့ ၁၅ရက်ကြာ တရုတ်လနှစ်သစ်ကူး (သို့) Lunar New Year မှာ တရုတ်လူမျိုးတွေအတွက် လာမယ့်နှစ်မှာ ကြွယ်ဝချမ်းသာမှုနဲ့ ကံကောင်းခြင်းတွေ ယူဆောင်လာတယ်လို့ ယုံကြည်ကြတာကြောင့်  ဒီကာလမှာ မိဘ၊ ဆွေမျိုးတွေ၊ အပေါင်းအသင်းတွေ၊ ချစ်ရသူတွေနဲ့ ပျော်ပျော်ပါးပါး ဖြတ်သန်းကြပြီး နှစ်သစ်ကို ကြိုဆိုကြပါတယ်။ ဒီလိုနှစ်သစ်ကူးပွဲတော်တွေမှာ စားကောင်းသောက်ဖွယ်ကလည်း မပါမဖြစ်မို့ ဘယ်လိုအစားအစာတွေစားကြလဲ၊ ဘယ်လိုအကြောင်းတွေကြောင့် စားကြလဲဆိုတာသိရအောင် ဒီဆောင်းပါးလေးကို မျှ‌ဝေလိုက်ပါတယ်။ 

ကြွယ်ဝခြင်း ဖက်ထုပ် 

ငွေအကြွေစေ့လေးတွေ ထည့်လို့ရတဲ့ အိတ်ပုံသဏ္ဌာန် ပြုလုပ်တတ်ကြတဲ့ ဖက်ထုပ်ဟာဆိုရင် ဒီလိုနှစ်သစ်ကူးပွဲတော်အချိန်တွေမှာတင် မဟုတ်ဘဲ တစ်နှစ်ပတ်လုံး လူကြိုက်များ စားတတ်ကြတဲ့ အစားအစားတစ်မျိုးပါ။ ကြိုက်နှစ်သက်စရာ အသား၊ တို့ဖူး၊ ကြက်ဉနဲ့ တခြားဟင်းသီးဟင်းရွက်လေးတွေ ထည့်အစာသွပ်ကြပြီး ပြုတ်တာ၊ ပေါင်းတာ၊ ကြော်တာဖြစ်ဖြစ် နည်းမျိုးစုံနဲ့ ပြင်ဆင်စားသောက်လို့ ကောင်းပါတယ်။ ဒါကြောင့်မို့ ကြွယ်ဝချမ်းသာမှုကို ကိုယ်စားပြုတဲ့ ဖက်ထုပ်လေးတွေဟာ တရုတ်နှစ်သစ်ကူးစားပွဲတွေပေါ မှာ မပါမဖြစ် ဖြစ်နေတော့တာပါ။

ပီကင်းမြို့က ဘဲဘုရင် 

နှစ်သစ်ကူးစားပွဲတွေရဲ့ အလယ်မှာ ခန့်ခန့်ညားညားနဲ့ နေရာယူထားတတ်တဲ့ နာမည်ကျော် ပီကင်းဘဲကင်ကိုတော့ မသိတဲ့သူ မရှိလောက်ပါဘူးနော်။ တရုတ်လူမျိုးတွေရဲ့ မင်္ဂလာအနီရောင်နဲ့ ဘဲကင်က ပျော်ရွှင်ကျန်းမာခြင်းနဲ့ လာဘ်လာဘတိုးပွားခြင်းကို ကိုယ်စားပြုပြီး တရုတ်ဟင်းပွဲတွေထဲ မပါမဖြစ် ကိုယ်စားလှယ်တစ်ဦးလိုမို့ နှစ်သစ်ကူးပွဲအခမ်းအနားတွေမှာ အဓိကဟင်းပွဲအနေနဲ့ တွေ့ရတတ်တာပါ။ ဒီလို ထူးခြားပြီး အရသာရှိတဲ့ ပီကင်းဘဲကင်ရဲ့ ကြွပ်ရွတဲ့ အပေါ် ယံအရည်ခွံနဲ့ နူးညံ့ချိုမြတဲ့အသားအတွက် ဂျင်း၊  ကရဝေးရွက်၊ နာနတ်ပွင့်၊ ဂျင်း၊ သစ်ဂျပိုးမှုန့်၊ တရုတ်မဆလာ၊ ကြက်သွန်ဖြူ၊ ပဲငံပြာရည်၊ ကြက်သွန်မြိတ်တို့နဲ့ အစာသွပ်ကာ ပျားရည်၊ ဆန်ဝိုင်၊ ရှာလကာရည်၊ တရုတ်မဆလာ၊ ဆား၊ ကြက်သွန်ဖြူ၊ ဆီတို့နဲ့ ဆော့စ်ပြုလုပ်ပြီး ကင်မယ်ဆို အရသာရှိတဲ့ ပီကင်းဘဲကင် ရပြီပေါ့။ 

တော်ဝင် ဝက်သားလုံးဟင်းပွဲ

တရုတ်နှစ်သစ်ကူးပွဲတွေမှာ ချန်ထားလို့မရတဲ့ ငြိမ်းချမ်းမှုနဲ့ ဟာမိုနီဖြစ်မှုတွေကို ဖော်ကျူးတဲ့ ဂန္တဝင် ဟင်းလျာကတော့ ဝက်သားလုံးနဲ့ ပတ်သတ်တဲ့ ဟင်းလျာတွေပါပဲ။ ကြော်ကြော်၊ ချက်ချက်၊ ပေါင်းပေါင်း နည်းမျိုးစုံနဲ့ စားလို့ကောင်းတဲ့ ဝက်သားလုံးတွေကတော့ ခြင်္သေ့ရဲ့ ဦးခေါင်းပုံစံရှိလို့  Lion’s Head Meatballs ဆိုပြီး တရုတ်နိုင်ငံအစဉ်အဆက် စားခဲ့ကြတဲ့ လူကြိုက်များဟင်းပွဲပါပဲ။ နှုတ်နှုတ်စဉ်းထားတဲ့ ဝက်သားရယ်၊ ဂျင်း၊ ကြက်သွန်မြိတ်၊ ဝက်‌မြေစာဉ၊ မှို၊ ခရုဆီ၊ ဟင်းချက်ဝိုင်၊  ငရုတ်သီးအစိမ်းမှုန့်၊ ပဲငံပြာရည်နဲ့ တခြားဟင်းခတ်အမွှေးအကြိုင်တွေနဲ့ဆို အသားလုံးတွေ စိုစိုအိအိနဲ့ စားကောင်းစေတဲ့ ဟင်းလျာတစ်ပွဲ ဖြစ်မှာပါ။ ဒီပါဝင်ပစ္စည်းတွေနဲ့ အသားလုံးတွေကို ဒီတိုင်း ပြောင်းဖူးမှုန့်၊ ကြက်ဥနှစ်တို့နဲ့ နယ်၊ လုံးပြီး စားလို့ရသလို ဟင်းလျာအနေနဲ့ သကြားရည်၊ ငရုတ်ရည်၊ ကော်ရည်၊ နှစ်သက်ရာ ဟင်းသီးဟင်းရွက်တိုနဲ့ ပျစ်ပျစ်နှစ်နှစ် ဝက်သားလုံးချိုချဉ်အဖြစ် အသွင်ပြောင်းပြီး စားလို့ရပါသေးတယ်။ 

တရုတ်နှစ်ကူးမုန့်ပဲစုံ

အဖြူရောင်၊ အဝါ‌ရောင်၊ အနီ‌ရောင် ဆေးဆိုးပြီး သကြားကုတ်တင်ထားတဲ့ ပဲလုံးတွေ၊ မွာလောက် လို့ခေါ် တဲ့ နှမ်းကပ်မုန့်ချောင်းတွေနဲ့ အသီးခြောက်တွေ၊ သကြားလုံး စတာတွေ ပါတဲ့ အဆာပြေမုန့်လေးတွေက တရုတ်ရိုးရာနှစ်သစ်ကူးကာလတွေမှာ တွေ့ရအများဆုံးလေးတွေပါ။ အနီရောင် စက္ကူအကန့်ဗူးလေးနဲ့ ကိုယ်တိုင်စားစား၊ လက်ဆောင်ပေးပေး စားတတ်ကြတဲ့ ဒီတရုတ်နှစ်ကူးမုန့်လေးတွေထဲမှာ အများစုပါတဲ့ ‌မြေပဲဆိုရင် အသက်ရှည်ကျန်းမာခြင်းနဲ့ သိက္ခာကြီးမြင့်ခြင်းတွေကို ကိုယ်စားပြုပါတယ်။ ဆားနည်းနည်းနဲ့ ပြုတ်တာဖြစ်ဖြစ်၊ လှော်တာဖြစ်ဖြစ် ပဲကို နည်းမျိုးစုံနဲ့ စားကြပေမဲ့ တရုတ်အယူအဆအရ အစိမ်းစားရင် ပိုကောင်းတယ်လို့လည်း ယူဆကြပါတယ်။ နောက်ပြီး နှစ်ကူးမုန့်တွေထဲ အပါအဝင်ဖြစ်တဲ့ နေကြာစေ့ကလည်း သား၊ သမီး ထွန်းကားမှုကို ကိုယ်စားပြုတာမို့ မင်္ဂလာရှိတဲ့ နှစ်သစ်ကူးမှာ ကံကောင်းစေတဲ့ မုန့်တွေလို့ ယူဆကြပါတယ်။ 

သက်ရှည်ခေါက်ဆွဲကြော်

အရိုးရှင်းဆုံးနဲ့ စားအကောင်းဆုံး ပွဲတိုင်းကျော် ခေါက်ဆွဲကြော်ကတော့ တရုတ်နှစ်ကူးရိုးရာအနေနဲ့ ပါဝင်နေကြ အစားအစာပါပဲ။ ခေါက်ဆွဲအမျှင်ရှည်လေ၊ အသက်ကြာကြာနေရလေလို့ ယူဆကြတာမို့ ခေါက်ဆွဲစားကြတဲ့အခါ အမျှင်မဖြတ်ဘဲ အားပါးတရ စားတတ်ကြပြီး အမျှင်ပြတ်ရင် အသက်တိုစေတယ်လို့ ‌ရှေးအယူရှိကြပါတယ်။ ဒါကြောင့် ချက်ပြုတ်တဲ့နေရာမှာလည်း ဂျုံခေါက်ဆွဲတွေကို မပြတ်သွား‌အောင် ဂရုတစိုက်ကြော်စားကြပြီး အရွက်မျိုးစုံ၊ အသားပြုတ်ရည်နဲ့ ပဲငံပြာရည် အဓိကထား သုံးကာ ခေါက်ဆွဲဟင်းပွဲတွေနဲ့ အရသာရှိရှိ နှစ်သစ်ကူးကို ဖြတ်သန်းကြပါတယ်။ 

လှေနဲ့တူတဲ့ ငါး 

ငါးကို တရုတ်အသံထွက် “Yú” ဆိုတာ ပေါများခြင်းလို့ အဓိပ္ပာယ်ရှိတာမို့ ကြွယ်ဝချမ်းသာလာစေတဲ့ အယူနဲ့ နှစ်နှစ်ခြုက်ခြုက် စားတတ်ကြပါတယ်။  ဒီဟင်းလျာအတွက် ရေချိုငါး အများစုကို ရွေးချယ်အသုံးပြုကြပြီး ပြီးပြည့်စုံစေတဲ့ အယူအဆနဲ့ ငါးရဲ့ ခေါင်းတွေ အမြီးတွေ မဖြတ်ဘဲ အကောင်လိုက် ကြော်တာ၊ ပေါင်းတာ လုပ်စားကြပါတယ်။ တရုတ်ဟင်းလျာတွေတိုင်း မပါမဖြစ် ပဲငံပြာရည်နဲ့ တခြားဟင်းခတ်အ‌‌မွှေးအကြိုင်တွေ ထည့်ကာ အမွှေးအကြိုင်အတွက် ငရုတ်ပွ၊ ဂျင်းနဲ့ ကြက်သွန်မြိတ်တို့ကို ထည့်ပေးနိုင်ပါတယ်။ 

ထူးခြားတဲ့ နောက်တရုတ်အယူအဆတစ်ခုကတော့ ငါးအကောင်လိုက် စားတဲ့အခါ တစ်ဖက်ကို စားပြီးရင် မလှန်ဘဲ အလယ်အရိုးကို ထုတ်ပြီး ဆက်စားကြပါတယ်၊ အကြောင်းကတော့ တစ်ဖက်ကို စားလို့ကုန်ပြီး နောက်တစ်ဖက်လှန်လိုက်တဲ့အခါ ငါးကို လှေနဲ့တူတဲ့အယူနဲ့ မှောက်သလိုဖြစ်ပြီး ကံမကောင်းတတ်စေလို့ပါပဲ။

နှစ်သစ်ကူးမုန့် 

အီကွေ့လို့ အများစုခေါ် ကြတဲ့ တီကွေ့ သို့ နှစ်သစ်ကူးမုန့်ဟာ သူ့ရဲ့ ချိုတဲ့အရသာနဲ့ စေးကပ်တဲ့ပုံ ကြောင့် အိမ်ရှိ မိသားစုဝင်တိုင်းကို တစ်နှစ်ပတ်လုံးအတွက် ပျော်ရွှင်ငြိမ်းချမ်းခြင်းနဲ့ စည်းလုံးခြင်းကို ပုံဖော်တာမို့ တရုတ်နှစ်သစ်ကန်တော့ပွဲတွေမှာ တွေ့ရအများဆုံးမုန့်တစ်မျိုးပါ။ ကောက်ညှင်းဆန်နဲ့ အဓိကလုပ်ကြတဲ့ တီကွေ့က လုပ်နည်းအမျိုးမျိုးရှိကြ‌ပြီးတော့ သကြားနဲ့လုပ်တဲ့ အဖြူရောင်တီ‌ကွေ့ရယ်၊ ကြံသကာနဲ့ လုပ်တဲ့ အညိုရောင်တီ‌ကွေ့ရယ်ဆိုပြီး နှစ်မျိုးရှိပါတယ်။ တွေ့ရများတဲ့ အညိုရောင်တီ‌ကွေ့ကို ကြံသကာ၊ အုန်းနို့နဲ့ သကြားအနည်းငယ်ကို ကြိုချက်ပြီး ကောက်ညှင်းမုန့်၊ ဆန်မုန့်တို့နဲ့ မုန့်နယ်ကာ ခွက်အဝိုင်းလေးတွေထဲ ထည့်ပေါင်းပြုလုပ်ပြီး လက်ဆောင်ပေးတတ်ကြပါတယ်။

ကဲ… နှစ်သစ်ကူးမှာ ကံထူးစေတဲ့ အဓိပ္ပာယ်အပြည့်နဲ့ တရုတ်ဟင်းပွဲတွေထဲက အချို့အကြောင်း ပြောပြပေးလိုက်ပါပြီနော်။ ချစ်ရသူတွေနဲ့ တရုတ်နှစ်သစ်ကူးပိတ်ရက်မှာ အရသာရှိပြီး တစ်နှစ်ပတ်လုံး ကံကောင်းစေမယ့် ဟင်းလျာတွေ ဖန်တီးရင်း တရုတ်နဂါးနှစ်သစ်ကို ပျော်ပျော်ရွှင်ရွှင်ဖြတ်သန်းလိုက်ရအောင်ပါ။