ခရီးသွားဖို့ ပြင်ကြမယ် ဆိုပြီးတွေးလိုက်တာနဲ့ အရင်ဆုံးတွေးမိတာက ဘယ်လိုအိတ်နဲ့ထည့်ရမလဲ ဆိုတာပဲ ဖြစ်မယ်ထင်ပါတယ်။ ခရီးဆောင်အိတ်ကောင်းတစ်လုံး ရွေးချယ်တယ်ဆိုတာ  ခရီးသွားဖို့ပြင်ဆင်တဲ့အပိုင်းတွေထဲက အရေးကြီးဆုံးအချက် တစ်ချက်ပါ။

ပိတ်ရက်ခရီးတိုတစ်ခုထွက်လို့ပဲဖြစ်ဖြစ်၊ ဝေးလံခေါင်ဖျားတဲ့နေရာတစ်ခုကို ခရီးရှည်ထွက်လို့ပဲဖြစ်ဖြစ်  ယူသွားတဲ့ခရီးဆောင်အိတ်က အကြမ်းခံ၊ လက်တွေ့ကျပြီး အသုံးဝင်တဲ့ အိတ်တစ်လုံးဖြစ်ဖို့ လိုအပ်ပါတယ်။ သင့်တော်တဲ့ခရီးဆောင်အိတ်တစ်လုံးရဖို့ရွေးချယ်တဲ့ အခါမှာ ရွေးချယ်စရာတွေများလွန်းနေတာက စိတ်ရှုပ်စရာတစ်ခုဖြစ်နိုင်ပါတယ်။ ဒီစာတိုလေးမှာတော့ ခရီးဆောင်အိတ်ကောင်းတစ်ခုရွေးချယ်တဲ့အခါ စဥ်းစားသင့်တဲ့ အချက်လေး (၅) ချက်ကို  ပြောပြပေးသွားမှာဖြစ်ပါတယ်။

(၁) အိတ်အရွယ်အစားနဲ့ ဝန်ဆံ့နိုင်မှု 

သင့်တော်တဲ့ခရီးဆောင်အိတ်တစ်လုံးကို ရွေးချယ်တော့မယ်ဆိုရင် အရွယ်အစားနဲ့  ပစ္စည်းဝန်ဆံ့နိုင်မှုကအရေးကြီးပါတယ်။ရွေးချယ်လိုက်တဲ့ခရီးဆောင်အိတ်က ခရီးဆောင်ပစ္စည်းတွေ အားလုံးဝင်ဆံ့နိုင်လောက်တဲ့အထိ ကြီးမားဖို့လိုအပ်ပေမယ့် ရှိသမျှအကုန်သယ်ယူဖို့လောက်အထိ အရမ်းကြီးမနေဖို့လည်း အရေးကြီးပါတယ်။ အသင့်တော်ဆုံးအချက်ကတော့ သုံးရက်ကနေငါးရက်စာ အဝတ်အစားနဲ့ ခရီးဆောင်ပစ္စည်းထည့်လို့ရနိုင်တဲ့အရွယ်အစား ရွေးချယ်ဖို့ပါပဲ။

(၂) အကြမ်းခံနိုင်မှု

ခရီးဆောင်အိတ်တစ်လုံးကိုဝယ်ယူတဲ့အခါ တာရှည်ခံ အကြမ်းခံနိုင်မှုကို ထည့်သွင်းစဥ်းစားဖို့ အရေးကြီးပါတယ်။ ခရီးဆောင်အိတ်တွေက ခရီးသွားနေတဲ့အချိန်တွေမှာ ပျက်စီးသွားတာမျိုး ဖြစ်နိုင်တဲ့အတွက်ကြောင့် ခရီးသွားစဉ်တစ်လျှောက် အကြမ်းခံ၊ မပျက်စီးနိုင်မယ့် ခရီးဆောင်အိတ်မျိုးရွေးချယ်ဖို့အရေးကြီးပါတယ်။ အကြမ်းခံနိုင်တဲ့ပစ္စည်းတွေဖြစ်တဲ့ ပိုလီကာဗွန်နိတ်၊ နိုင်လွန်၊ ဒါမှမဟုတ် မာကျောတဲ့ပစ္စည်းတွေကနေ လုပ်ထားတဲ့ခရီးဆောင်အိတ်မျိုးကို ရွေးချယ် ဝယ်ယူသင့်ပါတယ်။

(၃) သယ်ရလွယ်ကူမှု

သယ်ဆောင်ရလွယ်ကူခြင်းကတော့ ခရီးဆောင်အိတ်ကောင်းတစ်လုံးရွေးချယ်တဲ့အခါမှာ မပါမဖြစ် ထည့်သွင်းစဥ်းစားရမှာပါ။ အထူးသဖြင့် တစ်ကိုယ်တည်းခရီးထွက်တဲ့အခါ  သယ်ယူရလွယ်ကူတဲ့ ခရီးဆောင်အိတ်မျိုးဆို ပိုအဆင်ပြေပါတယ်။ ဒါကြောင့် ဘီးပါတဲ့အိတ်မျိုး၊ ပြောရရင် ဘီးလေးခုပါတဲ့အိတ်မျိုးကို ရွေးချယ်သင့်ပါတယ်။ ဒီလိုအိတ်မျိုးကပဲ လေဆိပ်စတဲ့ ခရီးသွားနေရာတွေကနေ သွားလာတဲ့အခါ သယ်ယူရအဆင်ပြေလွယ်ကူစေမှာဖြစ်ပါတယ်။

(၄) လုံခြုံစိတ်ချရမှု

ခရီးထွက်တဲ့အခါ လုံခြုံစိတ်ချရတဲ့အိတ်တစ်လုံး ဖြစ်ဖို့ကလည်း အရေးကြီးပါတယ်။ Built-in လုံခြုံရေးစနစ်နဲ့လုပ်ထားတဲ့ ဒါမှမဟုတ် သော့ခလောက်ထပ်ထည့်လို့ရတဲ့စိတ်ချယုံကြည်ရတဲ့ အိတ်မျိုးကို ရွေးချယ်သင့်ပါတယ်။ ဘေးနှစ်ဖက်လုံးမာကျောတဲ့ ခရီးဆောင်အိတ်မျိုးက ဓားနဲ့ ခွဲပြီး နှိုက်ရမလွယ်လို့ ပိုမိုစိတ်ချလုံခြုံပါတယ်။

(၅) စျေးနှုန်း

ခရီးဆောင်အိတ်တစ်လုံးဝယ်ယူတဲ့အခါ စျေးနှုန်းကိုလည်း  ချင့်ချိန်စဥ်းစားဖို့လိုအပ်ပါတယ်။အရည်‌‌သွေးအသင့်အတင့်နဲ့  ပိုက်ဆံအများကြီးမသုံးချင်ဘူးဆိုရင်တော့ စျေးနှုန်းသင့်တင့်ပြီး ကိုယ့်ရဲ့ ဘတ်ဂျက်နဲ့ကိုက်ညီတဲ့ အိတ်မျိုးကို ရွေးချယ်ဖို့မမေ့ပါနဲ့။

အိတ်အရွယ်အစား၊ အိတ်ရဲ့ ခံနိုင်ရည်အား၊ ဝန်ဆံ့နိုင်မှု၊ လုံခြုံမှု နဲ့ စျေးနှုန်းတွေကို ထည့်သွင်းစဥ်းစားပြီး ကိုယ့်ခရီးစဥ်နဲ့ လိုက်ဖက်တဲ့ အကောင်းမွန်ဆုံးအိတ်တွေကို ရွေးချယ်နိုင်ပါတယ်။ နောက်ခရီးစဥ်တွေအတွက်ပါ ထည့်သွင်းစဥ်းစားပြီး အကောင်းဆုံးအိတ်ကို ရွေးချယ်ဖို့လည်း မမေ့ပါနဲ့။