ခုခေတ်ခါမှာ အစားအစာတွေ ကြာရှည်ခံအောင်နဲ့ လတ်ဆတ်နေစေဖို့ ‌ရေခဲသေတ္တာအသုံးပြုပြီး သိုလှောင်ထားတတ်ကြပါတယ်။ ဒါပေမဲ့ တချို့အစားအစာတွေမှာတော့ အအေးခံသိမ်းဆည်းစရာမလိုဘဲ သူ့သဘာဝအပူချိန်မှာပဲ ထားသိုသင့်တဲ့အရာတွေလည်း ရှိနေတာပါ။ ဒါကိုမသိဘဲ ကြာကြာအထားခံအောင် ဆိုပြီး ပုံမှန်အတိုင်း ရေခဲသေတ္တာထဲ ထည့်လိုက်တဲ့အခါ ဒီအစားအစာတွေရဲ့ သဘာဝဓာတ်တွေ ပျက်စီးနိုင်ပြီး စားမိတဲ့အခါ ကျန်းမာရေးပါ ထိခိုက်နိုင်ပါတယ်။ ဒါ့ကြောင့် ဘယ်လိုအစားအသောက်တွေက ရေခဲသေတ္တာထဲ အေးခဲထားစရာမလိုဘဲ အခန်းအပူချိန်အတိုင်း ထားနိုင်လဲဆိုတာနဲ့ အေးခဲထားမိရင် နောက်ဆက်တွဲ ဘာတွေဖြစ်လာနိုင်လဲဆိုတာ အားလုံး သတိပြုရအောင် မျှဝေလိုက်တာမို့ အဆုံးထိ ဖတ်ကြည့်လိုက်ပါ။ 

ကော်ဖီ 

လူအများစု နှစ်ခြိုက်စွာ အမြဲသောက်တတ်ကြတဲ့ ကော်ဖီကို သတိမထားမိဘဲ ရေခဲသေတ္တာထဲ အလွယ် ထည့်သိမ်းမိဖူးမှာပါ။ အဲ့ကနေ ရေခဲသေတ္တာထဲရှိနေတဲ့ တခြားအစားအစာတွေရဲ့ အနံ့၊ အရသာတွေကို ကော်ဖီက စုပ်ယူတာမို့ သူ့သဘာဝ အနံ့၊အရသာပျောက်ပြီး ပျက်စီးနိုင်ပါတယ်။ ကော်ဖီကို အစေ့၊ အရည်ဖြစ်ဖြစ် ဘယ်လိုပုံသဏ္ဌာန်မှာမဆို ရေခဲသေတ္တာထဲ မထည့်သင့်ပါဘူး။ ကော်ဖီစေ့ကို လေလုံပြီး ခြောက်သွေ့အေးမြတဲ့နေရာမှာ ထားသိုပြီး ကော်ဖီကို ဖျော်ပြီးရင် သိမ်းမထားဘဲ တခါတည်းသောက်ဖို့ အကြံပြုပါရစေ။  

ပေါင်မုန့် 

လတ်လတ်ဆတ်ဆတ် ဖုတ်ပြီးသား ပေါင်မုန့်တွေကို သိမ်းဆည်းမယ်ဆို အပူဓာတ်၊ အစိုဓာတ်နဲ့ လေ မထိအောင် စက္ကူ သို့ ပလတ်စတစ် အိတ်သန့်သန့်တစ်ခုနဲ့ပဲ အေးမြခြောက်သွေ့တဲ့နေရာမှာ ထားသင့်တာပါ။ ရေခဲသေတ္တာထဲ ထည့်သိမ်းလည်း ရတယ်ဆိုပေမဲ့ အထဲမှာရှိတဲ့ အအေးဓာတ်ကြောင့် ပေါင်မုန့်ရဲ့ အစိုဓာတ်ကို ဆုံးရှုံးစေပြီး အရသာပေါ့လျော့သွားစေနိုင်လို့ပါပဲ။  

ကြက်သွန်ဖြူ/နီ 

ဟင်းချက်ခါနီး ကြက်သွန်ဖြူတွေကို ရေခဲသေတ္တာတွေ ထည့်သိမ်းမိပြီးမှ ရှာတွေ့ပြီဆို အများစုက ဖြူဖြူသန့်သန့်လေးတွေ မဖြစ်တော့ဘဲ ညိုပြီး မလတ်ဆတ်တော့တာ ကြုံဖူးကြမှာပါ။ ကြက်သွန်နီတွေလည်း ရေခဲသေတ္တာထဲ သိမ်းမိရင် အထဲမှာ ရေဓာတ်များလာပြီး မသိလိုက်ခင်မှာပဲ မှိုတက်ပြီး အတက်တွေ ထွက်နေလောက်ပါပြီ။ ဒါကြောင့် ကြက်သွန်ဖြူတွေရော၊ အနီတွေ‌ရောကို အေးမြခြောက်သွေ့တဲ့ နေရာမှာပဲထားရင် ဟင်းချက်ဖို့ အသုံးပြုခါနီးတိုင်းမှာ လတ်လတ်ဆတ်ဆတ်ဖြစ်နေမှာပါ။ 

ဂျင်း 

ဂျင်းကလည်း ပုံမှန်အားဖြင့် စိုစွတ်ပြီးအေးမြတဲ့ ရေခဲသေတ္တာလိုနေရာမျိုးမှာ ကြာရှည်လတ်ဆတ်နိုင်စွမ်းမရှိပါဘူး။ မှိုတက်နိုင်ခြေလည်း များပြီး ဘတ်တီးရီးယားပေါက်ဖွားမှုလည်း များတာကြောင့် သူ့သဘာဝအရသာနဲ့ လတ်ဆတ်မှုအတွက် မီးဖိုချောင်ရဲ့ သန့်ရှင်းခြောက်သွေ့တဲ့ နေရာမျိုးမှာပဲ သိမ်းဆည်းသင့်တာပါ။ 

ပဲငံပြာရည် 

ပဲငံပြာရည်က ရေခဲသေတ္တာထဲ ထည့်ရင်လည်း အဆင်ပြေနိုင်တယ်ဆိုပေမဲ့ အရသာပြောင်းလဲနိုင်ပြီး ကြာရှည်မခံပါဘူး။ ဆားပါဝင်မှုများတဲ့ ပဲငံပြာရည်ဟာ ပုံမှန်အခန်းအပူချိန်မှာဆို ၆လအထိ အထားခံနိုင်ပြီး ငံပြာရည် အမျိုးအစားနဲ့ အသုံးပြုမှုပုံမှာ မူတည်သေးတာမို့ ပုလင်းပေါ်မှာ ပါတဲ့ သက်ဆိုင်ရာအညွှန်းတွေအတိုင်း သိမ်းဆည်းသင့်တာပါ။ ထို့နည်းတူ တခြား ဟင်းခတ်အမွှေးအကြိုင်များတွေကို ရေခဲသေတ္တာထဲ ထည့်မိရင် အစိုဓာတ်ပေါများမှုကြောင့် ကပ်ထွေးကုန်ပြီး ပျက်စီးနိုင်ပါတယ်နော်။  

အာလူး 

အစားများကြတဲ့ အာလူးကိုတော့ စက္ကူအိတ်လေးတစ်ခုနဲ့ အခန်းအပူချိန်မှာပဲ သေချာထုပ်ပိုး၊ သိမ်းဆည်းထားမယ်ဆို အကောင်းဆုံးပါပဲ။ ဒါမှ စားဖို့ချက်ခါနီးတိုင်း ကိုင်ကြည့်လိုက်ရင် အလုံးတောင့်တောင့်တင်းတင်းနဲ့ လတ်ဆတ်ပြီး လှလှပပဖြစ်နေမှာပါ။မဟုတ်ဘဲ ရေခဲသေတ္တာထဲ ထည့်မိမယ်ဆို အထဲက အစိုဓာတ်ကြောင့် သူ့အရသာနဲ့ ပုံသဏ္ဌာန်ပျက်စီးနိုင်လို့ အာလူးကိုလည်း ဂရုပြုသိမ်းဆည်းသင့်ပါတယ်။ 

မုန်လာဥနီ၊ သခွားသီး၊ ငရုတ်ပွ 

ဒီဟင်းသီးဟင်းရွက် (၃)မျိုးတွဲက ‌ရေခဲသေတ္တာထဲ အချိန်ကြာရှည် ထည့်ထားမိရင် ကြွပ်ကြွပ်ရွရွ မဖြစ်တော့ဘဲ ရေထွက်များလာပြီး စားမကောင်းတတ်တော့ပါဘူး။ ဒါကြောင့် ဒီလိုလျင်လျင်မြန်မြန် မပျက်စီးစေဘဲ သဘာဝလတ်ဆတ်မှုလေးတွေ ကျန်နေအောင် ပုံမှန် အခန်းအပူချိန်နဲ့ ခြောက်ခြောက်သွေ့သွေ့ရှိတဲ့ မီးဖိုချောင်တစ်နေရာမှာ ထားထားသင့်ပါတယ်။  

အသီးအနှံ အများစုကလည်း ရေခဲသေတ္တာထဲ ထားရင် ရေငွေ့များပြီး မလတ်ဆတ်တော့ဘဲ အသီးရဲ့အရည်အသွေးလျော့ကျနိုင်ပါတယ်။ ဒီထဲမှာ ပန်းသီးက အခန်းအပူချိန်မှာပဲ ၁ပတ်ကျော်လောက်ထိ လတ်လတ်ဆတ်ဆတ် အစားခံနိုင်ပြီး ငှက်ပျောသီး၊ထောပတ်သီး၊ ဘယ်ရီသီး၊ ခရမ်းချဉ်သီးတို့ကလည်း ရင့်မှည့်အောင်နဲ့ လတ်ဆတ်နေစေဖို့ ပုံမှန်အခန်းအပူချိန်မှာပဲ ထားပြီး ရေခဲသေတ္တာထဲ ထည့်မသိမ်းသင့်ပါဘူး။  

ဟင်းသီးဟင်းရွက် အများစုကတော့ စျေးကဝယ်ပြီးတာနဲ့ ချက်ချင်းချက်စားတာ အကောင်းဆုံးပါပဲ။ မတတ်နိုင်ဘဲ ပိုနေလို့ ရေခဲသေတ္တာထဲ သိမ်းမယ်ဆိုရင်လည်း သေချာထုပ်ပိုးကာ ကြာကြာမပစ်ထားဘဲ စားသုံးလိုက်သင့်တာပါ။ မှိုနဲ့ ဘတ်တီးရီးယားအန္တရယ်ကိုလည်း ဂရုပြုသင့်တာမို့ လူကြီးလူငယ်မရွေး အစားအသောက်တွေကို သန့်ရှင်းလတ်ဆတ်တဲ့အချိန်မှာပဲ ရွေးချယ်စားသောက်ဖို့ အကြံပြုလိုက်ပါတယ်။