နှလုံးသားရေးရာ ကိစ္စတွေဟာ အနိမ့်အမြင့်အတက်အကျတွေနဲ့ ပြည့်နှက်နေတတ်ကြတာ အားလုံးအသိပါနော်။ ဒါပေမဲ့လည်း ပျော်ရွှင်ရတဲ့ အမြင့်အခြေအနေတွေက နည်းပါးပြီး ဝမ်းနည်းပူဆွေးရတဲ့ အနိမ့်အခြေအနေတွေချည်းပဲ များနေတဲ့အခါမှာတော့ ဒီကိစ္စကို အသေအချာ ကိုင်တွယ်ဖြေရှင်းဖို့ အချိန်ကျပြီပေါ့။ ဒါကြောင့် ယနေ့ခေတ်မှာ လူငယ်တိုင်းလိုလို မလွတ်ကင်းနိုင်တဲ့ နှလုံးသားရေးရာ ပြဿနာတွေကို အကောင်းဆုံးရင်ဆိုင်ဖြေရှင်းနိုင်မယ့် နည်းလမ်းလေးတွေကို ဝေမျှပေးလိုက်ပါရစေ။ 

စိတ်ခံစားချက်များကို အရှိအတိုင်းလက်ခံပါ

ပထမဆုံးအနေနဲ့ မိမိခံစားနေရတဲ့ စိတ်ခံစားချက်ဟာ သဘာ၀ကျတယ်လို့ လက်ခံနိုင်ပါစေ။ တကယ်တော့ စိတ်ခံစားချက်တွေဆိုတာဟာ ဘ၀ရဲ့ မပါမဖြစ်တဲ့ အရသာလေးတွေဖြစ်သလို နှလုံးရေးရာကိစ္စမှာတော့ ကင်းဗတ်စပေါ်က ဆေးရောင်စုံပန်းချီကားလေးသဖွယ် ဖြစ်လို့နေပါတယ်။ ဒါကြောင့် ပျော်ရွှင်ပီတိ၊ စိတ်ပျက်ရမှု၊ ဒေါသနဲ့ ခံစားရသမျှ အားလုံးသောရသတွေကို အပြည့်အ၀ တွေ့ကြုံခံစားဖို့ မိမိကိုယ်ကိုယ် ခွင့်ပြုလိုက်ပါနော်။ ဒါ့အပြင် ခံစားနေရုံတင်မကပဲ အဲဒီခံစားချက်တွေကို အရှိအတိုင်း လက်ခံနားလည်ဖို့လည်း အရေးကြီးပါတယ်။ သင်ခံစားနေရတဲ့ ခံစားချက်တွေကို တစ်ဖက်လူသိအောင် ဖွင့်ဟဝန်ခံပြီး သူတို့ခံစားချက်တွေကိုလည်း ပြန်လည်နားထောင်လို့ ဘုံတူညီချက်တစ်ခုကို ရှာဖွေနိုင်ပါတယ်နော်။ တစ်ဦးခံစားချက်ကို တစ်ဦးနားလည်တယ်ဆိုရင်တော့ ပွတ်တိုက်မှုတွေကို ရှောင်ရှားပြီး ဆက်ဆံရေးပိုမိုခိုင်မြဲဖို့အတွက် အခွင့်အရေးတစ်ခုလည်း ဖြစ်သွားနိုင်တာပေါ့။ 

ကိုယ်ခန္ဓာ ကျန်းမာရေးကို ဂရုစိုက်ပါ

ကျန်းမာတဲ့ ဆက်ဆံရေးကောင်းတစ်ခု ရှိဖို့ဆိုတာ သင်ကိုယ်တိုင်ကျန်းမာနေမှ ဖြစ်နိုင်မှာပါ။ ကိုယ်ခန္ဓာကျန်းမာရေးဆိုတာ အားကစားလုပ်နေမှ အသီးအရွက်ချည်း စားနေမှ ပြည့်စုံတာမျိုးတော့ မဟုတ်ပါဘူးနော်။ လုံလောက်စွာ အိပ်စက်ခြင်း၊ စိတ်ဖိစီးမှု လျှော့ချခြင်း၊ မိမိနှစ်သက်မြတ်နိုးတဲ့ အလုပ်လေးတွေကို အချိန်ပေးလုပ်ဆောင်ခြင်း စတာတွေအားလုံးဟာ သင့်ရဲ့ကျန်းမာရေးကို အထောက်အကူပြုပါတယ်။ ကိုယ်ခန္ဓာကို ဂရုတစိုက်နဲ့ ကျန်းမာအောင်ထားမှသာ နှလုံးသားရေးရာပြဿနာတွေကိုလည်း ရဲရဲရင့်ရင့် ရင်ဆိုင်ဖြေရှင်းဖို့ ဖြစ်နိုင်မှာပေါ့။ ဒါ့အပြင် လှုပ်ရှားတက်ကြွတဲ့ နေထိုင်မှုပုံစံက အင်ဒေါ်ဖင် (Endorphins) ဟော်မုန်းကိုလည်း ထွက်ပေါ်စေပြီး သင့်ရဲ့ စိတ်ခံစားချက်ကို မြှင့်တင်ပေးနိုင်တယ်လေ။ 

စိတ်ကျန်းမာရေးကို ဂရုပြုပါ

ဒီလို ခက်ခဲတဲ့ အခြေအနေမိုးမှာ ကိုယ်ခန္ဓာကျန်းမာရေးလိုပဲ စိတ်ကျန်းမာရေးဟာလည်း အရေးကြီးပါတယ်။ နှလုံးသားရေးရာကိစ္စဟာ တစ်ခါတရံမှာ သင့်စိတ်ခံစားချက်ကို ဝန်ထုပ်ဝန်ပိုးကြီးတစ်ခုလို ပိနေစေနိုင်တယ်လေ။ ဒါကြောင့် အကူအညီယူဖို့ နောက်မတွန့်ပါနဲ့။ စိတ်ပိုင်းဆိုင်ရာ ဆွေးနွေးညှိနှိုင်းပေးမယ့် Therapist နဲ့ တွေ့ဆုံခြင်း၊ တရားရှုမှတ်ခြင်း၊ မိမိဝါသနာပါရာ လုပ်ငန်းတွေကို အချိန်ပေးလုပ်ဆောင်ခြင်းတို့နဲ့အတူ သင့်ရဲ့ စိတ်ကျန်းမာရေးကို အမြင့်ဆုံးအဆင့်ရောက်အောင် ပြုစုပျိုးထောင်ပေးနိုင်ပါတယ်။ စိတ်ကျန်းမာရေးဟာ၊ နှလုံးသားရေးရာ အပါအဝင် ကျန်းမာတဲ့ဆက်ဆံရေးတွေကို ဖော်ဆောင်ပေးနိုင်တာ မမေ့ပါနဲ့နော်။

အထောက်အကူဖြစ်တဲ့ ပတ်ဝန်းကျင်ကို ဖန်တီးပါ

နှလုံးသားရေးရာကိစ္စဆိုတာ နူးညံ့တဲ့ ပန်းပင်လေးတစ်ပင်လိုပဲ ရှင်သန်ပွင့်လန်းဖို့အတွက် မှန်ကန်တဲ့ ပတ်ဝန်းကျင်တစ်ခု လိုအပ်ပါတယ်နော်။ အချင်းချင်း ပွင့်ပွင့်လင်းလင်း ဆက်သွယ်ပြောဆိုနိုင်မယ့်၊ အထောက်အကူဖြစ်တဲ့ ဝန်းကျင်တစ်ခုကို ဖန်တီးပါ။ တစ်ယောက်ရဲ့အိပ်မက်ကို တစ်ယောက်က ကူညီအားပေးပြီး ခက်ခဲတဲ့စိန်ခေါ်မှုတွေကို အတူရင်ဆိုင်လို့ အောင်ပွဲတွေကိုလည်း အတူတကွ မျှဝေခံစားပါ။ ဒီလို သေးငယ်တဲ့အပြုအမူလေးတွေက ရေရှည်တည်တံ့တဲ့ ဆက်ဆံရေးတစ်ခုအတွက် အုတ်မြစ်ကို ချမှတ်ပေးနိုင်ပါတယ်။ 

မိမိကိုယ်ကိုယ် ပြန်လည်ရှာဖွေပါ

နှလုံးသားရေးရာ လှိုင်းလုံးတွေကြားမှာ ကူးခတ်ရင်း မိမိရဲ့ ကိုယ်ပိုင်လက္ခဏာနဲ့ ကိုယ်ပိုင်ရုပ်ပုံလွှာတို့လည်း ပျောက်ဆုံးသွားတတ်ပါတယ်။ ဒါကြောင့် မိမိကိုယ်ကိုယ် ပြန်လည်ရှာဖွေဖို့အတွက် အချိန်ယူပါ။ စိတ်ဝင်စားမှု အသစ်တွေ၊ ဝါသနာတွေကို ပြန်လည်အချိန်ပေး လုပ်ဆောင်ပါ။ အိပ်မက်ထဲက ခရီးစဉ်လေးကို ကိုယ်တိုင်အကောင်အထည်ဖော်ပါ။ မိမိရဲ့ ကိုယ်ပိုင်ရုပ်ပုံလွှာကို ကိုယ်စားပြုထင်ဟပ်တဲ့အခါ နှလုံးသားရေးရာမှာလည်း သင့်ရဲ့အစစ်မှန်ဆုံးပုံရိပ်ကို ဖော်ထုတ်ပြသနိုင်ပါတယ်။ 

နှလုံးသားရေးရာ ဆက်ဆံရေးတွေဟာ ကိုယ်စီထူးခြားတဲ့ သီးခြားဘ၀နှစ်ခုကြားက ဟန်ချီညီမျှတဲ့ နှစ်ပါးသွားအကနဲ့ တူတာမို့ အခက်အခဲအားလုံးကို ကျော်လွန်ဖို့အတွက် ပြီးပြည့်စုံတဲ့ ဖြေရှင်းနည်းတော့ မရှိနိုင်ပါဘူးနော်။ ဒါပေမဲ့ အထက်မှာ ပြောသွားတဲ့ အချက်လေးတွေကို လိုက်နာမယ်ဆိုရင်တော့ ပိုမိုခိုင်မာပြီး အတွန်းအတိုက်ခံနိုင်တဲ့ နှလုံးသားရေးရာဆက်ဆံရေးတစ်ခုကို ထူထောင်ဖို့ အထောက်အကူ ဖြစ်နိုင်မှာပါနော်။ နောက်ဆုံးတစ်နေ့မှာတော့ အချစ်ရေးကိစ္စမှာ ကာယကံရှင်တွေရဲ့ ကြိုးစားအားထုတ်မှုနဲ့ စိတ်ဆန္ဒကသာ အခရာဖြစ်တယ် ဆိုတာကို မမေ့ပါနဲ့နော်။