တစ်ချိန်က အန္တ‌ရာယ်များတယ်လို့ မထင်မှတ်ထားခဲ့တဲ့ သကြားဓာတ်ဟာ၊ ပြီးခဲ့တဲ့ နှစ်တွေမှာတော့ နှလုံးကျန်းမာရေးကို ထိခိုက်စေတယ်ဆိုပြီး သတိထားစောင့်ကြည့်မှုတွေကို ရင်ဆိုင်ခဲ့ရပါတယ်။ အချိုရည်၊ အဆင့်ဆင့်ပြုပြင်ထုတ်လုပ်ထားတဲ့ အစားအစာ၊ အချိုပွဲ စတဲ့ပုံစံအမျိုးမျိုး  အသွင်းယူထားတဲ့ အချိုဓာတ်ကို အလွန်အကျွံစားသုံးခြင်းဟာ နှလုံးနဲ့ သွေးလည်ပတ်မှုဆိုင်ရာ ပြဿနာတွေကို ဖြစ်ပေါ်စေနိုင်ပါတယ်။ ဒါကြောင့် ယခုဆောင်းပါးလေးမှာတော့ သကြား (သို့) အချိုဓာတ်က နှလုံးအပေါ် ဘယ်လိုသက်ရောက်မှုရှိစေသလဲ၊ အပိုဆောင်း သကြားဓာတ်တွေရဲ့ အကျိုးဆက်နဲ့ ပိုမိုကျန်းမာဖို့အတွက် အချိုစားသုံးမှုကို ဘယ်လိုထိန်းချုပ်သင့်တယ်ဆိုတဲ့ အချက်လေးတွေကို ဆွေးနွေးပေးသွားမှာ ဖြစ်ပါတယ်။  

အချိုဓာတ်၏ ကျန်းမာရေးအပေါ် အကျိုးသက်ရောက်မှုများ

သကြားဓာတ်အများအပြား စားသုံးရင် သွေးထဲက သကြားဓာတ်ပမာဏကို အချိန်တိုအတွင်း အလျင်အမြန် မြင့်တက်လာစေပြီး အင်ဆူလင်ပမာဏကိုလည်း ထိုးတက်လာစေပါတယ်။ ဒီလို အဖြစ်များတဲ့အခါ အင်ဆူလင်ခံနိုင်အားမြင့်မားလာပြီး နှလုံးရောဂါအမျိုးမျိုးနဲ့ Type-2 ဆီချိုရောဂါတို့ကို ဖြစ်ပွားစေနိုင်ပါတယ်။ ဒါ့အပြင် သကြားဓာတ်မြင့်မားခြင်းဟာ ကိုယ်ခန္ဓာတွင်း ယောင်ယမ်းမှုပမာဏကိုလည်း မြင့်မားစေပြီး၊ သွေးကြောတွင်း အဆီလွှာတွေ ပေါ်ပေါက်လာစေဖို့ အားပေးပါတယ်။ ထိုမှတဆင့် သွေးလည်ပတ်စီးဆင်းမှုကို ထိခိုက်စေပြီး နှလုံးတိုက်ခိုက်မှုနဲ့ လေဖြတ်ခြင်းတို့အထိ ဖြစ်ပေါ်စေနိုင်လို့ သတိထားသင့်ပါတယ်။ ဒါ့အပြင် ကယ်လိုရီများပြားပြီး အာဟာရဓာတ်နည်းပါးတဲ့ အချိုဓာတ်ဟာ ကိုယ်အလေးချိန်မြင့်မားခြင်းနဲ့ အ၀လွန်ခြင်းတို့ကိုလည်း ဖြစ်ပေါ်စေနိုင်ပါတယ်။ 

အပိုဆောင်းသကြားဓာတ်များ၏ အန္တရာယ်

ပြင်ဆင်ထုတ်လုပ်စဉ်အတွင်း ထပ်မံထည့်သွင်းထားတဲ့ သကြားဓာတ်တွေကို အပိုဆောင်းသကြားဓာတ်တွေလို့ ခေါ်ပါတယ်။ အချိုရည်၊ သကြားလုံး၊ ကိတ်မုန့်ပေါင်မုန့် စတဲ့ အစားအစာတွေမှာ အပိုဆောင်းသကြားဓာတ် အများအပြား ပါဝင်လေ့ရှိပါတယ်နော်။ ဒီလိုအပိုဆောင်းသကြားဓာတ်တွေကြောင့် ကယ်လိုရီပမာဏ မြင့်မားစေခြင်း၊ သွေးပေါင်ချိန်မြင့်မားစေခြင်းနဲ့ သွေးတွင်းအဆီဓာတ် မြင့်မားစေခြင်းတို့ကို ဖြစ်ပေါ်စေနိုင်တာကြောင့် ပြုပြင်ထားတဲ့ အသင့်စား အစားအသောက်တွေကို သတိပြုစားသုံးသင့်ပါတယ်။ ကယ်လိုရီမြင့်မားခြင်း၊ သွေးပေါင်ချိန်မြင့်မားခြင်းနဲ့ သွေးတွင်းအဆီဓာတ်မြင့်မားခြင်းတို့ဟာ နှလုံးရောဂါဖြစ်ပွားနိုင်ခြေကို သိသိသာသာမြင့်တက်စေတာကြောင့် အပိုဆောင်းသကြားဓာတ်များကို သတိပြုဆင်ခြင်စားသုံးသင့်ပါတယ်။ 

အချိုဓာတ်နှင့် သကြားစားသုံးမှုကို စီမံခန့်ခွဲခြင်း

စူပါမားကက်တွေမှာ ပြုပြင်ထုတ်လုပ်ထားတဲ့ အစားအသောက်တွေကို ဝယ်ယူတော့မယ်ဆိုရင် ပါဝင်ပစ္စည်းတွေကို အသေအချာဖတ်ရှုသင့်ပါတယ်နော်။ အပိုဆောင်းသကြားဓာတ်တွေကို sucrose, fructose, glucose, corn syrup စသည်ဖြင့် အခြားနာမည်တွေနဲ့လည်း တွေ့ရှိရတတ်ပါတယ်။ သဘာ၀သကြားဓာတ်နဲ့ အဓိကအာဟာရဓာတ်များစွာ ပါဝင်တဲ့ သစ်သီး၊ ဟင်းသီးဟင်းရွက်၊ အစေ့အဆံနဲ့ အသားငါးတွေလည်း ဦးစားပေးရွေးချယ်နိုင်ပါတယ်။ နောက်တစ်ချက်ကတော့ သကြားဓာတ် များစွာပါဝင်တဲ့ အသင့်သောက်အချိုရည်၊ အားဖြည့်အချိုရည်တွေကို လျှော့သောက်ပြီး ရေ၊ ရေနွေးကြမ်းနဲ့ သဘာ၀အသီးဖျော်ရည်တွေကို ပိုမိုဦးစားပေးသောက်သုံးသင့်ပါတယ်။ အချိုဓာတ်များစွာပါဝင်တဲ့ ကိတ်မုန့်၊ ပေါင်မုန်၊ ကွတ်ကီးတွေကို သင့်တင့်မျှတစွာစားသုံးပြီး မိမိအိမ်မှာ ကိုယ်တိုင်ပြင်ဆင်ချက်လုပ်တဲ့ လတ်ဆတ်တဲ့ ဟင်းလျာတွေကို အရသာရှိရှိ သုံးဆောင်နိုင်ပါတယ်။ 

နိဂုံးချုပ်ရရင်၊ နေ့စဉ်းစားသုံးနေတဲ့ အချိုဓာတ်နဲ့ အပိုဆောင်းသကြားဓာတ်တွေဟာ နှလုံးရောဂါ၊ အ၀လွန်ရောဂါနဲ့ အခြား သွေးလည်ပတ်မှုဆိုင်ရာ ရောဂါတွေကို ပိုမိုဖြစ်ပွားစေပါလို့ အသက်အရွယ်မရွေး သတိထား စားသုံးသင့်ပါတယ်နော်။ အခုဆိုရင် သကြားဓာတ်က မိမိကိုယ်ခန္ဓာအပေါ် ဘယ်လိုဆိုးကျိုးသက်ရောက်သလဲဆိုတာ သိရှိပြီဖြစ်တဲ့အတွက် ဆင်ခြင်သတိပြုနိုင်မယ်လို့ ယုံကြည်ပါတယ်။ ဒါ့အပြင် အထက်မှာဝေမျှခဲ့သလို၊ အသင့်စားစားသောက်ကုန်တွေရဲ့ ပါဝင်ပစ္စည်းတွေကို သတိထားဖတ်ရှုခြင်း၊ အချိုရည်တွေလျှော့သောက်ပြီး သစ်သီး၊ ဟင်းသီးဟင်းရွက်နဲ့ အစေ့အဆံတွေကို ပိုမိုစားသုံးခြင်းဖြင့်လည်း အချိုဓာတ်ရဲ့ အန္တရာယ်ကို လျှော့ချနိုင်ပါတယ်။ ဒါကြောင့် သင့်ကိုယ်တွင်းက ချိုမြမြရန်သူကို အမြဲမပြတ် သတိထားပြီး မိမိတို့နှလုံးသားလေးရဲ့ ကျန်းမာရေးကို ဂရုစိုက်နိုင်ကြပါစေလို့ ဆုမွန်ကောင်းတောင်းလိုက်ပါတယ်။