‌တစ်နေ့တာကို ခွန်အားအပြည့်နဲ့စတင်နိုင်ဖို့ဆိုရင် မနက်စာကောင်းကောင်းက အရေးအကြီးဆုံးပါပဲ။ စားနေကျမနက်စာတွေ စားရတာ ရိုးလာပြီဆိုရင် ဒီ အီတလီမနက်စာ ဖီတာ့တာ(Frittata) လေးကို လုပ်စားကြည့်ပါလား။ အီတလီရိုးရာ ဖီတာ့တာက လုပ်ရတာလည်းမခက်ဘဲ အာဟာရပြည့်ဝ၊ အရသာရှိလို့ အကြိုက်တွေ့မှာပါ။

လိုအပ်တဲ့ ပါဝင်ပစ္စည်းတွေက ...

• ငရုတ်ကောင်း
• သံလွင်ဆီ
• နွားနို့
• ကြက်သွန်နီ၊ ကြက်သွန်ဖြူ
• မှို
• ကြက်ဥ
• ဝက်သား
• ဟင်းနုနွယ်
• ချယ်ရီခရမ်းချဥ်သီး
• စမုန်စပါး 
• parmesan cheese
• mozzarella cheese

ပြုလုပ်နည်း အဆင့်ဆင့်ကို ဆက်ကြည့်လိုက်ကြရအောင် ...

• အရင်ဆုံး Oven ကို အပူပေးထားပါ။
• အသီးအရွက်တွေနဲ့ ဝက်သားကို အရွယ်အစားညီညီ လှီးထားပါ။
• ဇလုံတစ်လုံးထဲမှာ ကြက်ဥနဲ့ နွားနို့ကို သမအောင် မွှေလိုက်ပါ။
• ဆီအနည်းငယ်ကို အပူပေးပြီး ဝက်သားကို ကြော်ပါ။ လှီးထားတဲ့ အသီးအရွက်တွေကိုလည်း ထည့်ကြော်ပါ။ အနံ့မွှေးလာအောင် ကြက်သွန်ဖြူ၊ ဆားနဲ့ ငရုတ်ကောင်း ထည့်ရပါမယ်။

• ကျက်သွားပြီဆိုရင် စောနကမွှေထားတဲ့ ကြက်ဥနဲ့ နို့ထဲကို ထည့်၊ parmesan cheese နဲ့ mozzarella cheese တွေကိုပါ ထည့် သမအောင်မွှေပြီး Oven ထဲ မိနစ် (၂၀) ထည့်ဖုတ်ပေးပါ။

ဒါဆိုရင်တော့ အရသာရှိတဲ့ မနက်စာ ဖီတာ့တာလေးကို စားသုံးနိုင်ပါပြီ။